Sylwch fod y fersiwn Saesneg o’r telerau hyn ar gael isod. 

Os bydd telerau ac amodau cyffredinol BBC Plant mewn Angen yn gwrthdaro â’r Telerau Arbennig hyn, y Telerau Arbennig fydd yn cael blaenoriaeth. 

I gael rhagor o wybodaeth am Hebryngwyr, ewch i – Hebryngwyr (Chaperones) 

1. Diffiniadau 

Bydd telerau a gaiff eu diffinio yn y Telerau ac Amodau cyffredinol yn berthnasol i’r Telerau Arbennig hyn, oni nodir yn benodol fel arall.  Yn ogystal, bydd yr ystyron canlynol i’r termau canlynol: 

1.1 Mae “Hebryngwr” yn golygu person dros 18 oed sydd wedi’i gymeradwyo o dan Reoliad 15 o Reoliadau Plant (Perfformiad a Gweithgareddau) (Lloegr) 2014, i fod â gofal a rheolaeth dros blentyn er mwyn diogelu, cefnogi a hyrwyddo lles y plentyn tra bydd yn cymryd rhan mewn perfformiad, ymarfer, gweithgaredd neu’n byw oddi cartref yn ystod cyfnod y Drwydded. 

1.2 Mae hebryngwyr yn gweithredu in loco parentis ac yn ymarfer y gofal y gellid disgwyl yn rhesymol i riant da ei roi i blentyn.  

1.3 Mae “Trwydded” yn golygu’r awdurdodiad cyfreithiol sydd gan hebryngwr i oruchwylio plentyn tra bydd yn cymryd rhan mewn perfformiad, ymarfer, gweithgaredd neu’n byw oddi cartref. 

2. Dyletswyddau a Chyfrifoldebau Hebryngwyr 

2.1 Fel Hebryngwr, eich prif gyfrifoldeb yw sicrhau lles a goruchwyliaeth y plentyn/plant yn eich gofal Chi  

2.2 Rhaid i Chi fod yn ymwybodol o ofynion deddfwriaethol, gan gynnwys, ond heb fod yn gyfyngedig i, Reoliadau Plant (Perfformiadau a Gweithgareddau) (Lloegr) 2014 neu Reoliadau Plant (Perfformiadau a Gweithgareddau) (Yr Alban) 2014    

2.3 Rhaid i chi fod yn gyfarwydd â Pholisïau Diogelu BBC Plant mewn Angen fel y’u darperir i chi gan eich archebwr neu gan Gyswllt yn BBC Plant mewn Angen a, lle bo hynny’n berthnasol i’ch ymgysylltiad, â Pholisi Diogelu’r BBC a Chanllawiau Golygyddol y BBC. Maent ar gael yma:  

Polisi Diogelu’r BBC  

Canllawiau Golygyddol y BBC 2025 

2.4 Rhaid i Chi ddarparu tystiolaeth eich bod wedi cwblhau cwrs ar-lein yr NSPCC, ‘Amddiffyn Plant yn y Diwydiant Adloniant’ (o fewn 3 blynedd)    

2.5 Rhaid i Chi sicrhau bod y plentyn yn cael cyfleoedd addas ar gyfer gweithgareddau hamdden a’i fod yn cael ei amddiffyn rhag pwysau, straen, tywydd garw ac unrhyw amodau eraill sy’n debygol o’i niweidio.    

2.6 Rhaid i Chi gadw mewn cysylltiad â’ch Awdurdod Trwyddedu Chi (os yw’n berthnasol), Awdurdod Trwyddedu’r plentyn/plant, Awdurdod Lleol yr ardal y mae’r plentyn yn perfformio ynddi, asiant y plentyn (os yw’n berthnasol) a Rhiant/Gwarcheidwad Cyfreithiol y plentyn/plant.

3. Trwyddedau Hebryngwyr a Phlant ac Aelodaeth y Cynllun PVG 

3.1 Un o amodau Eich cyflogaeth fel Hebryngwr yw bod gennych Chi un o’r pethau canlynol: 

3.2 Os ydych Chi’n Hebryngwr yng Nghymru, yn Lloegr neu yng Ngogledd Iwerddon, Trwydded ddilys i Hebryngwyr a gyhoeddwyd gan eich Awdurdod Lleol Chi, a bydd gofyn i Chi ddarparu copi ohoni i BBC Plant mewn Angen neu’r BBC (yn ôl y cyfarwyddyd) ar gais.  

3.3 Os ydych Chi’n Hebryngwr yn yr Alban, aelodaeth o’r Cynllun PVG (Amddiffyn Grwpiau Agored i Niwed), a bydd gofyn i Chi ddarparu copi o’r naill neu’r llall i BBC Plant mewn Angen neu’r BBC (yn ôl y cyfarwyddyd) ar gais.  

3.4 Os ydych Chi wedi gwarantu bod gennych Chi Drwydded Hebryngwr ddilys, Gwiriad manwl cyfredol (gyda Rhestr Gwahardd ar gyfer plant) gan y Gwasanaeth Datgelu a Gwahardd, neu eich bod Chi’n aelod o’r Cynllun PVG (fel y bo’n briodol), rydych Chi’n cytuno i gadarnhau unrhyw newidiadau i’r swydd honno yn ystod Eich cyflogaeth â BBC Plant mewn Angen, neu cyn derbyn unrhyw waith pellach.     

3.5 Rydych Chi’n cytuno i sicrhau Eich bod yn gwbl gyfarwydd â thelerau Trwydded y plentyn rydych Chi’n ei hebrwng, ac yn gyfarwydd â’r trwyddedau a roddir gan yr Awdurdodau Lleol, ac fel o fewn Eich gallu Chi, dylech sicrhau bod unrhyw rai o amodau’r Trwyddedau’n cael eu bodloni.  

3.6 Rydych Chi’n gwarantu bod gan y plentyn/plant rydych Chi’n ei/eu hebrwng drwydded ddilys a byddwch yn darparu’r drwydded honno i BBC Plant mewn Angen neu’r BBC (yn ôl y cyfarwyddyd) ar gais

4. Diogelu Data 

Gallwch brosesu Data Personol o bryd i’w gilydd wrth gyflawni eich rhwymedigaethau o dan y Contract fel a ganlyn: 

Categorïau Gwrthrychau Data: plant/pobl ifanc sy’n cael eu hebrwng a’u rhiant/gwarcheidwad 

Mathau o Ddata Personol: enw, cyfeiriad, dyddiad geni/oed, gwybodaeth allweddol neu “stori”, manylion unrhyw faterion penodol gan gynnwys, heb gyfyngiad, materion iechyd, y daflen alwadau, rhiant/gwarcheidwad y plentyn/person ifanc: manylion cyswllt mewn argyfwng. 

Diben Angenrheidiol y Prosesu: at ddibenion darparu’r gwasanaethau neu’r elfennau i’w cyflawni a nodir yn eich Archeb / Contract Archebu yn unig. 

Rhaid i chi gydymffurfio â’r Telerau ac Amodau cyffredinol wrth Brosesu Data Personol o’r fath.