Credwn fod iechyd meddwl da yn hanfodol er mwyn i blant a phobl ifanc ffynnu, datblygu’n gymdeithasol ac yn emosiynol a dysgu. Rydym yn cydnabod bod llawer gormod o blant yn methu â chael gafael ar gymorth ar gyfer eu hiechyd meddwl, yn enwedig ar y cam cynnar hollbwysig pan fydd problemau a heriau’n dechrau dod i’r amlwg. Rydyn ni’n gwybod bod angen cymorth ar blant a phobl ifanc gyda phroblemau wrth iddyn nhw ddechrau dod i’r amlwg neu drwy eu hatal rhag datblygu o gwbl.

Mae ein cyllid yn canolbwyntio ar wella llesiant cymdeithasol ac emosiynol plant a phobl ifanc, cyn gynted â phosibl, cyn cyrraedd pwynt o argyfwng.

Ni fyddwn yn ariannu:

‘Ymyriadau pwynt argyfwng’ sy’n rhai tymor byr/cyfyngedig o ran amser, ac sydd wedi’u cynllunio i sefydlogi unigolion sy’n wynebu argyfwng ar frys. Mae hyn yn cynnwys ymyriadau ‘clinigol’ fel ymyriadau a gwasanaethau cwnsela ffurfiol/strwythuredig, therapïau seicolegol neu driniaethau clinigol/meddygol eraill sy’n digwydd ar ôl cyrraedd pwynt o argyfwng.

Rydyn ni’n cydnabod bod tlodi ac amddifadedd yn gymhleth ac yn cael effaith ddofn ar fywydau plant a phobl ifanc, gan gynnwys iechyd meddwl a chorfforol, datblygiad plentyndod, addysg, perthnasoedd a chyfleoedd bywyd. Gwyddom fod mynediad at amrywiaeth o gymorth i liniaru effaith tlodi ac amddifadedd yn allweddol, gan gynnwys mynd i’r afael ag anghenion uniongyrchol, mynediad at gyfleoedd a phrofiadau datblygiadol a chyfoethog, cymorth ar gyfer llesiant corfforol ac iechyd meddwl a gweithgareddau sy’n mynd i’r afael ag annhegwch systemig ac anghenion lleol.

Mae ein cyllid yn canolbwyntio ar liniaru effaith tlodi ac amddifadedd ar fywydau plant a phobl ifanc. Mae hyn yn cynnwys mynd i’r afael ag anghenion sylfaenol/uniongyrchol (fel yr amlinellir uchod), mynediad at gyfleoedd a phrofiadau datblygiadol a chyfoethog, gwella cyfleoedd bywyd a chymorth ar gyfer llesiant corfforol ac iechyd meddwl a gweithgareddau sy’n mynd i’r afael ag anghenion lleol.

Ni fyddwn yn ariannu:

Anghenion sylfaenol a chymorth materol os mai nhw yw unig ffocws prosiect. Mae ein rhaglen Hanfodion Brys yn cefnogi plant unigol sy’n byw mewn tlodi difrifol.

Rydyn ni’n cydnabod bod annhegwch a gwahaniaethu sy’n gysylltiedig ag ethnigrwydd, anabledd, rhywedd, hunaniaeth o ran rhywedd a hunaniaeth rywiol yn effeithio ar blant a phobl ifanc. Bod rhwystrau systemig a strwythurol yn effeithio ar ddatblygiad a llesiant corfforol ac emosiynol, addysg, cyflogaeth, cyfiawnder troseddol, a sefyllfa economaidd-gymdeithasol. Gwyddom fod y rhwystrau hyn yn lleihau mynediad at gyfleoedd a chymorth, yn cynyddu allgáu ac arwahanrwydd, yn effeithio ar iechyd meddwl ac yn cynyddu’r risg o dlodi, gan effeithio ar gyfleoedd bywyd a llesiant. Gwyddom fod angen cymorth a chyfleoedd datblygiadol cyfoethog ar blant a phobl ifanc sydd ar y cyrion, sy’n mynd i’r afael â materion unigol a systemig.

Mae ein cyllid yn canolbwyntio ar sicrhau bod plant a phobl ifanc y mae rhwystrau strwythurol a systemig a gwahaniaethu yn effeithio arnyn nhw, gan gynnwys ethnigrwydd, anabledd, rhywedd, hunaniaeth o ran rhywedd a hunaniaeth rywiol, yn cael mynediad at y cyfleoedd a’r gefnogaeth sydd eu hangen arnyn nhw.

Rydyn ni’n cydnabod nad oes gan bob plentyn a pherson ifanc fywydau cartref sefydlog, diogel a hapus. Mae amrywiaeth o faterion a heriau’n effeithio ar blant, pobl ifanc a’u teuluoedd, gan gynnwys cam-drin domestig, teuluoedd yn chwalu a gwahanu, gan gynnwys rhiant yn y carchar, profedigaeth, rhieni sy’n camddefnyddio sylweddau/alcohol, cyfrifoldebau gofalu, esgeulustod a thrawma. Gwyddom fod angen cymorth cyfoethog a thrawsnewidiol ar blant a phobl ifanc a’u teuluoedd sy’n mynd i’r afael â diogelwch, llesiant corfforol ac emosiynol, perthnasoedd a datblygiad personol a chorfforol.

Mae ein cyllid yn canolbwyntio ar sicrhau bod plant a phobl ifanc sy’n wynebu heriau sy’n ymwneud â’u teulu yn cael y cymorth sydd ei angen arnyn nhw, gan gynnwys gofalwyr ifanc, plant a phobl ifanc sydd â phrofiad o ofal a phrofedigaeth.

Byddwn yn ariannu Prosiectau a Sefydliadau i’r pethau canlynol:

• Cynnig cysylltiadau hwyliog a chymdeithasol sydd wedi’u gwreiddio mewn cymunedau lleol ac sy’n hygyrch i bawb
• Sefydlu prosiectau hygyrch, cynhwysol yn y gymuned sy’n mynd i’r afael â nifer o heriau sy’n wynebu plant a phobl ifanc y mae tlodi ac amddifadedd yn effeithio arnyn nhw.
• Darparu gwaith ieuenctid datgysylltiedig i gyrraedd plant a phobl ifanc mewn ardaloedd difreintiedig ynysig.
• Rhoi cymorth i blant a phobl ifanc lesbiaidd, hoyw, deurywiol a thrawsrywiol
• Cefnogi plant a phobl ifanc Du, Asiaidd ac ethnig leiafrifol y tu allan i ddinasoedd De Cymru
• Cefnogi plant a phobl ifanc sy’n gorfforol anabl, yn fyddar neu’n ddall
• Cefnogi plant a phobl ifanc y mae salwch neu gyflyrau hirdymor neu sy’n cyfyngu ar eu bywyd yn effeithio arnyn nhw

I sefydliadau sy’n gwneud cais i weithio ar draws dwy neu fwy o wledydd neu ranbarthau’r DU, byddwn yn ariannu gwasanaethau ar gyfer plant a phobl ifanc:

• Sydd ag anabledd corfforol
•  Mae cyflyrau sy’n cyfyngu ar fywyd neu’n bygwth bywyd yn effeithio arnyn nhw
• Mae cyflyrau iechyd cronig a phrin yn effeithio arnyn nhw